Fréttir

— segir Sigurður Ragnarsson verslunarstjóri Krambúðarinnar við Hjarðarhaga —

„Ég kynntist ekki þessari ísbúð en það er gaman að rifja upp sögur af henni því ennþá koma einstaka manneskjur hér inn og spyrja um gömlu Dairy Queen-ísbúðina,“ segir Sigurður Ragnarsson, 39 ára verslunarstjóri Krambúðarinnar við Hjarðarhaga. „En það er alltaf hægt að fá ís hjá okkur,“ bætir hann við brosandi.

Það hefur verið sterkur verslunar­kjarni við Hjarðarhagann í áratugi. Ísbúðin sem um er rætt er gamla Dairy Queen-ísbúðin sem var um árabil við hliðina á gömlu Hagabúðinni þar sem Krambúðin er núna. Dairy Queen í Aðalstrætinu var flaggskipið en Hjarðarhaginn átti sína kúnna og var hluti af rúntinum. Það eru áratugir síðan.

Í verslunarstörfum frá 16 ára aldri

Sigurður hefur verið með annan fótinn í verslunarstörfum frá 16 ára aldri og verið verslunarstjóri í Krambúðinni við Hjarðarhaga í um fimm ár. Hann hóf ferilinn í 10-11 við Staðarbergið í Hafnarfirði og fór á milli búða. Árið 2018 urðu vistaskipti þegar hann hóf störf hjá Samkaupum sem verslunarstjóri Krambúðarinnar við Hjarðarhaga.

Hann ólst upp í Vestmannaeyjum til sex ára aldurs og lítur enn á sig sem Eyjapeyja sem heldur með ÍBV. Hann á skyldmenni í Eyjum, amma hans býr þar sem og systkini móður hans – nema eitt þeirra sem býr í Danmörku.

Ólst upp í Eyjum – en Melaskólinn fyrsti skólinn

Þrátt fyrir Eyjatengslin er Sigurður á vissan hátt kominn á bernskuslóðir sínar í Vesturbænum. „Þegar pabbi hóf nám í háskólanum fluttumst við hingað og ég var í Melaskólanum í fjögur ár. Eftir það fluttum við til Hafnarfjarðar þar sem ég bjó öll unglingsárin og gott betur. Hér í Krambúðinni við Hjarðarhaga er ég því á slóðum æskuminninganna og fer fram hjá Melaskólanum á hverjum degi.“

Sigurður segir að sumarið hafi verið mjög gott. „Þetta hefur verið mjög fínt enda alveg ótrúlega gott veður megnið af sumrinu. Gott veður lífgar alltaf upp á alla verslun því fólk er meira á ferðinni og kaupir oftar inn.“

Dyggir viðskiptavinir Krambúðarinnar

Það er minna um erlenda ferða­menn í Kram­búðinni við Hjarðar­haga en í mörgum öðrum Kram­búðum. „Við erum fyrir utan miðbæinn og ekki alveg í leiðinni fyrir hinn hefðbundna erlenda túrista. Þetta er fyrst og fremst hverfisverslun með mjög dygga og trausta viðskiptavini sem koma daglega og maður hefur afgreitt lengi. En auðvitað sjáum við ný andlit á hverjum degi; sérstaklega yfir sumarið.“

Þrjár sprengjur yfir daginn

Yfir vetrartímann setja skólarnir svip á verslunina en tveir grunnskólar eru í hverfinu; Hagaskóli og Melaskóli. Hagaskólakrakkarnir hafa alltaf verið duglegir að sækja búðina heim. „Það er hægt að tala um þrjár sprengjur yfir daginn; tíu-frímínútur á morgnana, hádegishléið og svo eftir skóla. Seinni partinn er það svo hin hefðbundna síðdegistraffík í versluninni.“

Hann segir að fjöldinn allur af tilboðum hafi verið hjá þeim í sumar. Sömu tilboðin eru í grunninn í hverjum mánuði í öllum Kram­búðum. „En við fáum svigrúm til að meta aðstæður og stilla fram vörum sem við teljum að sé eftirspurn eftir hverju sinni – og það þarf engan veginn að vera það sama í öllum búðum enda kúnnahópurinn oft misjafn.“

Bakað stanslaust frá átta til þrjú

Bakaríið í Krambúðinni er mjög vinsælt og það er bakað stanslaust frá klukkan átta til þrjú á daginn. „Við seljum mikið af bakkelsi og úrvalið er alltaf að aukast. Við fáum allt forbakað og hitum upp hér á staðnum. Eftir sumarfrí í ágúst tókum við til dæmis upp nýjar tegundir af kleinuhringjum og heitum samlokum sem slegið hafa í gegn, enda á fínu verði, matarmiklar og því vinsælar.“

Starf með skóla varð ævistarfið

Eftir árin í Vesturbænum og í Melaskólanum lá leiðin til Hafnarfjarðar þegar hann var tíu ára. „Hafnarfjörður er einstakur bær en ég tel mig samt meiri Eyjamann en Hafnfirðing. Ég fór í Flensborgarskólann og það var einmitt þar sem ég leitaði mér að vinnu með skólanum, eins og gengur, og úr varð starf í 10-11 við Staðarbergið þar sem núna er verslunin Iceland. Þetta reyndist stærra skref en ég hélt því verslunarstörf hafa verið starfsvettvangur minn nær óslitið síðan.“

Sigurður segist ekki hafa verið mikið í íþróttum þótt hann fylgist mjög vel með sumum þeirra. „Ég spriklaði um tíma í marki og hafði gaman af en áttaði mig fljótlega á að ég yrði ekki atvinnumaður í faginu. Ég fylgist hins vegar mjög vel með fótbolta.“

Eyjapeyi og þjóðhátíð

En hvernig var að alast upp í Eyjum til sex ára aldurs? „Það var mjög fínt. Mikið frelsi sem við krakkarnir höfðum og gátum ærslast. Uppátækin voru ekki alltaf vinsæl og ég man enn þegar við vorum skömmuð hressilega fyrir að klifra í fiskinetum,“ segir hann og hlær.

En Eyjapeyi og þjóðhátíð í Eyjum hljóta að fara saman – ekki satt? „Jú, ég fór sem barn með foreldrum mínum á þjóðhátíð yfir daginn og kom við í hvítu tjöldunum. Svo þegar maður hafði aldur til varð þetta meira djamm og heimsóknir til skyldmenna. Þjóðhátíð í Eyjum stendur alltaf fyrir sínu.“

Rigndi niður á Hróarskelduhátíð

Tónlist og tónleikar eru eitt helsta áhugamál Sigurðar. Eftirminnilega tónleika erlendis segir hann hafa verið Hróarskelduhátíðina árin 2006 og 2007. „Það var dúndrandi sól og blíða fyrra árið og svo mætti maður árið eftir nánast á „sandölum og ermalausum bol“, eins og segir í laginu. En þá gerði mestu rigningu í manna minnum. Þarna fuku og rigndi niður tjöld fyrstu nóttina. Þetta var svakalegt en tók á sig ævintýrablæ eftir á, eins og oft vill verða.“

Samskipti við fólk það besta við starfið

En verslunin er komin á fullt skrið eftir annars líflegt sumar við Hjarðarhagann með tilheyrandi skorpum og rabbi við viðskiptavinina. „Hér hef ég kynnst mörgum viðskiptavinum og geri mér far um að spjalla stuttlega við þá í leiðinni þegar þeir koma. Það er nú einu sinni svo að samskiptin við viðskiptavini og starfsfólk eru skemmtilegasti hlutinn af verslunarstarfinu,“ segir Sigurður Ragnarsson.

59 fyrirtæki, 6 sveitarfélög og 11 opinberir aðilar hljóta viðurkenningu Jafnvægisvogarinnar, hreyfiaflsverkefnis FKA. Á árinu 2022 bættust við 57 nýir þátttakendur í hóp þeirra aðila sem taka þátt í Jafnvægisvoginni.

Frábær árangur á meðal þátttakenda í Jafnvægisvog FKA
Jafnvægisvogin, hreyfiaflsverkefni Félags kvenna í atvinnulífinu (FKA), hélt í dag stafrænu ráðstefnuna Jafnrétti er ákvörðun, sem streymt var í beinni útsendingu á vefsíðu RÚV. Þar kynnti Eliza Reid viðurkenningarhafa Jafnvægisvogarinnar, en það eru þeir þátttakendur sem hafa náð að jafna kynjahlutfall í efsta lagi stjórnunar (framkvæmdastjórn). Á ráðstefnu Jafnvægisvogarinnar árið 2021 voru viðurkenningarhafar 53 talsins en í ár voru þeir samtals 76. Að hreyfiaflsverkefninu standa auk FKA, forsætisráðuneytið, Sjóvá, Deloitte, Pipar\TBWA og Ríkisútvarpið.

Fimmtíu og níu fyrirtæki, sex sveitarfélög og ellefu opinberir aðilar hljóta viðurkenningu
Jafnvægisvogin veitti viðurkenningar til fimmtíu og níu fyrirtækja, sex sveitarfélaga og ellefu opinberra aðila úr hópi þeirra 209 þátttakenda sem hafa undirritað viljayfirlýsingu. Markmið Jafnvægisvogar um 40/60 kynjahlutfall í efsta stjórnendalagi var haft til hliðsjónar við matið. Stór hluti þeirra þátttakenda sem hafa skrifað undir viljayfirlýsingu Jafnvægisvogarinnar hafa náð góðum árangri á þessu sviði og fjölgaði þeim þátttakendum sem hafa náð markmiðunum um 23 á milli ára.
„Það hefur verið gaman að fylgjast með Jafnvægisvoginni stækka undanfarin ár og jafnréttismál verða að mikilvægu forgangsmáli hjá okkar þátttakendum. Þátttakendur taka stoltir við viðurkenningu Jafnvægisvogarinnar og hafa verið duglegir að vekja athygli á jafnréttismálum innan sinna vinnustaða með ýmsum hætti. Því miður eru konur eingöngu 24% framkvæmdastjóra fyrirtækja á Íslandi og hefur hlutfallið eingöngu farið upp um 3% á síðustu tíu árum. Ég er þó bjartsýn á að hlutfallið muni fara hraðar upp á næstu árum með aukinni vitundarvakningu meðal þeirra sem taka ákvörðun um ráðningar“ segir Thelma Kristín Kvaran, verkefnastjóri Jafnvægisvogarinnar.

Jafnrétti hefur bein áhrif á umhverfið
Á ráðstefnu Jafnvægisvogarinnar 2020 var kynntur nýr Jafnréttislundur FKA, sem Skógræktarfélag Reykjavíkur útvegaði Jafnvægisvoginni. Lundurinn er staðsettur við aðalinnganginn í Heiðmörk, Vífilsstaðamegin, og er það fyrsta sem fólk sér þegar það gengur inn í Heiðmörk. Í ár voru gróðursett 76 tré, eitt fyrir hvern viðurkenningarhafa árið 2022. Valdar voru margar tegundir af trjám sem tákn um þann fjölbreytileika sem Jafnvægisvogin er að stuðla að. Alls er búið að setja niður 173 tré í Jafnréttislundi á síðustu 3 árum. Það er markmið Jafnvægisvogarinnar að endurtaka þetta árlega og væri ánægjulegt að sjá hlíðina fyllast á næstu árum, með auknu jafnrétti.

Aðgengileg og skýr framsetning upplýsinga
Jafnvægisvogin heldur úti mælaborði sem er ætlað að halda utan um tölfræðilegar upplýsingar um jafnrétti. Þannig er hægt að tryggja aðhald og góða frammistöðu. Í mælaborði Jafnvægisvogarinnar koma fram allar helstu opinberar upplýsingar um stöðu stjórnenda í íslensku atvinnulífi og innan hins opinbera og þær gerðar aðgengilegar á einfaldan og skýran hátt.

Bættist í hóp fyrirtækja og sveitarfélag sem sjá sér hag í að vinna með Jafnvægisvoginni
Mikill vilji hefur verið hjá fyrirtækjum, sveitarfélögum og opinberum aðilum að vinna að jafnréttismálum þegar kemur að æðstu stjórnendum. Á árinu undirrituðu alls fjörutíu og sjö fyrirtæki, tvö sveitarfélög og átta opinberir aðilar viljayfirlýsingu um að vinna að markmiðum Jafnvægisvogarinnar og bættust þar með í hóp þeirra sem undirrituðu á síðustu árum. Þátttakendur eru orðnir 209 þátttakendur talsins. Fjölbreyttur mannauður hefur jákvæð áhrif á afkomu fyrirtækja sem og starfsánægju og frammistöðu í starfi, stuðlar að betri ákvarðanatöku og aukinni verðmætasköpun þar sem nýsköpun og vöxtur verður frekar í hópi fólks með ólíkar skoðanir og bakgrunn. Þátttakendur hafa þannig sýnt í verki að þau vilja virkja allan mannauðinn.

Eftirfarandi fyrirtæki, sveitarfélög og stofnanir hlutu viðurkenningu Jafnvægisvogarinnar í ár:

1. 1912
2. A4
3. AGR Dynamics
4. Akraneskaupstaður
5. Atmonia
6. AwareGO
7. BL
8. Blue Lagoon
9. BYKO
10. Coca-Cola European Partners
11. Creditinfo
12. Dagar
13. Deloitte
14. dk hugbúnaður
15. Einingaverksmiðjan
16. Elkem Ísland
17. ELKO
18. Ernst & Young
19. Fangelsismálastofnun
20. Félagsbústaðir
21. Fjallabyggð
22. Fly Play
23. Framkvæmdasýslan-Ríkiseignir
24. GG verk ehf
25. Guðmundur Arason
26. Hafnarfjarðarbær
27. Hagstofa Íslands
28. Háskóli Íslands
29. Heilbrigðisstofnun Austurlands
30. Heilbrigðisstofnun Suðurlands
31. Hirzlan
32. HS Orka
33. indó sparisjóður
34. Isavia
35. Íslandsbanki
36. Íslandshótel
37. Íslandspóstur
38. Krónan
39. Landgræðslan
40. Landsvirkjun

41. Lyf og heilsa
42. Lyfja
43. Lögreglan á höfuðborgarsvæðinu
44. Mannvit
45. Miklatorg
46. Múlaþing
47. Norðurál Grundartanga
48. Norðurorka
49. Nova
50. Olís
51. Orka náttúrunnar
52. Orkan
53. Orkusalan
54. Orkuveita Reykjavíkur
55. Ósar – lífæð heilbrigðis
56. Pipar\TBWA
57. Rafal
58. Rangárþing ytra
59. Reykjanesbær
60. Rio Tinto á Íslandi
61. SaltPay
62. Samkaup
63. Sjóvá
64. Skatturinn
65. Sólar
66. Taktikal
67. Tryggingastofnun
68. Tryggja
69. Vátryggingafélag Íslands
70. Vegagerðin
71. Veitur
72. Veritas
73. Vörður tryggingar
74. Vinnueftirlitið
75. Wise
76. Ölfusborg

Frekari upplýsingar veitir: Thelma Kristín Kvaran verkefnastjóri Jafnvægisvogar FKA, sími 690 7643,
jafnvaegisvogin@fka.is

Krambúðin opnar á laugardaginn í Urriðaholtsstræti 2-4 í Urriðaholti Garðabæ, í húsnæði þar sem verslunin Nær var áður til húsa. Með opnun matvöruverslunarinnar í Urriðholti verða Krambúðirnar orðnar 22 talsins, en þær eru staðsettar víðsvegar um landið.

Garðbæingurinn, Gunnur Líf Gunnarsdóttir, er framkvæmdastjóri verslunar- og mannauðssviðs Samkaupa, en Samkaup rekur alls 60 verslanir víðsvegar um landið m.a. undir merkjum Krambúðarinnar, Nettó og Kjörbúðarinnar.

Urriðaholtið sérstaklega spennandi kostur

Er Gunnur Líf ánægð með að loks sé Samkaup að opna sína fyrstu verslun, Krambúðina í heimabæ hennar, Garðabæ? ,,Það er ótrúlega skemmtilegt að koma með Krambúð inn í Urriðaholtið í Garðabænum. Okkur finnst Urriðaholtið sérstaklega spennandi kostur þar sem hverfið er vistvottað og ætlum við að leggja okkur fram við að taka þátt í þeirri vegferð með því að hafa verslunina eins sjálfbæra og hægt er. Við hlökkum til að taka þátt í að styrkja kjarnann á svæðinu með góðum nágrönnum og fjölbreyttri en persónulegri þjónustu til íbúa.”

Hefur það lengi staðið til að opna verslun í Garðabæ og af hverju varð Urriðaholtið fyrir valinu til að opna Krambúð? ,,Upp kom tækifæri að taka yfir verslunarrými sem var nú þegar til staðar í hverfinu og Urriðaholtið er spennandi hverfi í mikilli uppbyggingu. Við val staðsetninga á Krambúðum viljum við staðsetja okkur í miðjum íbúahverfum og vera valmöguleiki í nærumhverfi íbúanna.”

Krambúðin er verslun sem mætir nútímaáskorunum fólks

Fyrir hvað stendur Krambúðin – hvernig verslun verður þetta? ,,Krambúðin er verslun sem mætir nútímaáskorunum fólks, sem er oft á hlaupum í amstri dagsins og í kapphlaupi við tímann. Þegar ekki fæst tími til að keyra út í búð er Krambúðin til staðar í nágrenninu, Við opnum snemma og lokum seint og með þessum rúma opnunartíma getum við þjónustað okkar viðskiptavini þegar þörfin kallar. Krambúðin er hverfisverslun með persónulega þjónustu, svolítið eins og kaupmaðurinn á horninu, þar sem við leggjum við því áherslu á sanngjart verð á helstu nauðsynjavörum og skjóta þjónustu. “

Eins og þú nefnir þá verður Krambúðin græn verslun, hvað merkir það? ,,Með grænum verslunum er átt við að öll tæki og starfsemi verslunarinnar eru hugsuð út frá sjálfbærni, sem þýðir að ölltæki eru umhverfisvæn og notast við umhverfisvæna kælimiðla, LED-lýsing er í versluninni, allt sorp er flokkað til hins ýtrasta, allir kælar og frystar eru lokaðir, svo eitthvað sé nefnt,” segir hún og bætir við: ,,Allt er þetta gert til þess að draga úr kolefnisspori verslunarinnar sem rímar vel við sjálfbærnistefnu Urriðaholts þar sem unnið er með sjálfbæra þróun, fjölbreytileika og með virðingu fyrir umhverfi og samfélagi.”

Þannig að það á vel við að opna Krambúðina í Urriðaholti þar sem hverfið er vistvottað? ,,Græn Krambúð í Urriðaholti samræmist vel stefnu okkar hjá Samkaupum, eiganda Krambúðarinnar. Við einsetjum okkur að vera leiðandi í umhverfismálum á dagvörumarkaði, t.d. með því að minnka úrgang, draga úr matarsóun og stuðla að enn betri flokkun á sorpi. Lokaðir kælar í verslunum leiða til að mynda til 20% minni orkunotkunar og orka sem kemur frá kælivélum er síðan nýtt til húshitunar þegar kostur er. Markmið Samkaupa er að allar verslanir okkar verði orðnar grænar árið 2030.”

Mörg góð opnunartilboð

Þið eruð að opna á laugardaginn, verða einhver opnunartilboð í boði? ,,Já, það verða mörg góð tilboð um opnunarhelgina í Krambúðinni, bæði sem miða að fjölskyldum í hverfinu til dæmis eru góð tilboð á Ellas barnamat sem og fyrir þá sem langar í eitthvað í kósýkvöldið, snakk og súkkulaði. Þá má nefna að í hverri viku eru ný tilboð í Krambúðinni sem hefur verið góður kostur fyrir viðskiptavini.”

Allir velkomnir í Krambúðina

Urriðaholt er mjög spennandi hverfi með fjölda íbúa og er enn í uppbyggingu – þannig að þið ætlið að sinna íbúum hverfisins vel og bjóðið að sjálfögðu alla Garðbæinga, hvar sem þeir búa í bænum, velkomna í Krambúðina Urriðaholti? ,,Auðvitað, það eru allir velkomnir í Krambúðina,” segir hún brosandi.

Aldrei að vita nema fleiri verslanir bætist við í Garðabæ

En hvað með framhaldið, Samkaup búið að taka fyrsta skrefið inn fyrir bæjarmörk Garðabæjar, stefnið þið á að opna fleiri verslanir í Garðabæ t.d. á Álftanesi þar sem verið að reisa nýjan miðbæjarkjarna þar sem gert er ráð fyrir matvöruverslun? ,,Við erum alltaf til í að skoða þau tækifæri sem felst í opnun nýrra verslana. Samkaup leggur sig fram að þjónusta samfélög út um allt land og því aldrei að vita nema fleiri verslanir bætist við í Garðabæ.”

Sanngjarnt verð á nauðsynjavörum og skjót þjónusta við fólk á hraðferð

Og það verður vel rúmur opnunartími í Krambúðinni Urriðaholti, opið alla virka daga frá kl. 08 til 23:30 á kvöldin og 9 til 23:30 um helgar? ,,Sem hverfisverslun viljum við að Krambúðin geti boðið viðskiptavinum okkar upp á sanngjarnt verð á nauðsynjavörum og skjóta þjónustu við fólk á hraðferð. Opnunar-tíminn í Krambúð er vel rúmur svo að hægt sé að þjónusta viðskiptavini í sínu nærumhverfi á helstu þarfatímum.”

Lukkuhjól og kynning á vildarkerfinu Samkaupa

Og þú hvetur bæjarbúa að koma við á laugardaginn, skoða verslunina og nýta sér frábær opnunartilboð? ,,Já, við hlökkum til að taka á móti bæjarbúum í Krambúðinni á laugardaginn næsta en við munum á opnuninni vera með lukkuhjól og kynningu á vildarkerfinu okkar, þar sem þú hefur tækifæri til að fá enn betri kjör í verslunum Samkaupa, þar á meðal Krambúðinni.”

Opnunartilboðin verða alla helgina og svo áframhaldandi tilboð allan september mánuð. ,,Ég hvet að sjálfsögðu alla bæjarbúa til að mæta og fagna nýrri þjónustu sem styrkir samfélagið,” segir Gunnur Líf að lokum.